अध्यक्षद्धयलाई शिवमायाको यस्तो चुनौती

  काठमाडौं । उपसभामुख डा. शिवमाया तुम्बाहाङ्फेले प्रधानमन्त्री तथा नेकपाका अध्यक्ष केपी शर्मा ओली र अर्का अध्यक्ष पुष्पकमल दाहाल ‘प्रचण्ड’समक्ष आफूले उपसभामुखबाट राजिनामा नदिने दोहोर्याएकी छन् ।

अध्यक्षद्धयले गरेको राजिनामाको आग्रहलाई उनले दोस्रो पटक पनि अस्वीकार गरेकी हुन् । सचिवालय बैठकको निर्णयसमेत नमानेपछि दुवै नेताले उनलाई आइतबार विहान बालुवाटारमै बोलाएर राजिनामाका लागि आग्रह गरेका थिए ।

तुम्बाहाम्फेले आफूलाई सभामुखमा उम्मेदवार बनाए मात्रै राजिनामा दिने अडान राख्दै आएकी छन् ।

यस अघि पनि उनले आफूलाई सभामुख नबनाए नेकपाले नै सभामुख पद गुमाउनु पर्ने भन्दै राजिनामा नदिने बरु महाअभियोग लगाएर हटाउन समेत चुनौति दिएकी थिइन् ।

आज अध्यक्षद्धयसामु उनले शुक्रबारसम्म आफूलाई सभामुख बनाउने निर्णय नगरे चुनावी प्रक्रिया थाल्ने पनि चेतावनी दिएकी थिइन् ।

उक्त छलफलमा उपप्रधानमन्त्री ईश्वर पोखरेल र नेकपा महासचिव बिष्णु पौडेल पनि सहभागि थिए ।

डा. तुम्बाहाङ्फेले राजीनामा नदिएमा नेकपा सामु उनैलाई सभामुख बनाउने, समानुपातिक सांसदको सूचीबाट उनको नाम हटाउने र त्यो पनि सम्भव नभए पार्टीले निर्वाचन आयोगलाई पत्र लेख्ने र त्यो पनि सम्भव नभए अन्तिम विकल्प चाहिँ महाअभियोग नै हो

हुनत उनले महाअभियोग लगाएर हटाउनसमेत चुनौती दिइसकेकी छन् ।