कांग्रेसको सरकारमा बडुलाई गृह र थापालाई शिक्षा मन्त्रालयको जिम्मेवारी

  काठमाडौं । प्रमुख प्रतिपक्षी दल नेपाली कांग्रेसले छाया सरकार गठन गरेको छ । पार्टी सभापति शेरबहादुर देउवाले संसदीय दलको विधानको धारा ९ को उपधारा ५ (क) अनुसार छाया सरकारको रुपमा काम गर्न मन्त्रालय स्तरीय समन्वय समिति बनाएका हुन् ।

गृह समितिको संयोजकमा दिलेन्द्रप्रसाद बडू, उर्जामा ज्ञानेन्द्रबहादुर कार्की, परराष्ट्रमा नारायण खड्का र अर्थमा मिनेन्द्र रिजाल संयोजक तोकिएका छन् ।

त्यसैगरी शहरी विकासमा उमाकान्त चौधरी, खेलकुदमा किशोर सिंह राठौर, उद्योगमा मीन विश्वकर्मा, शिक्षामा गगन थापा, खानेपानीमा सुजाता परियार, स्वास्थ्यमा पार्वती डिसी चौधरी संयोजक तोकिएका छन् ।

त्यस्तै पर्यटनमा देवेन्द्र कँडेल संयोजक तोकिए भने श्रममा डिला संग्रौला र सञ्चार समितिको संयोजकमा बहादुर सिंह लामा तोकिएका छन् ।

त्यसैगरी, भूमिसुधारमा लक्ष्मी परियार, संघीय मामिलामा अतहर कमाल मुसलमान, कृषिमा पद्मनारायण चौधरी, महिलामा उमा रेग्मी, रक्षामा भीमसेनदास प्रधान, भौतिक पूर्वाधारमा सञ्जयकुमार गौतम संयोजक तोकिएका छन् ।

वनमा राजेन्द्र केसी र कानुन मन्त्रालयको समितिको संयोजकमा राधेश्याम अधिकारी तोकिएको नेपाली कांग्रेसले जनाएको छ ।