भारतमा सम्पन्न एसियन सभात च्याम्पियनसिपमा क्वालिटीका सुन्दर पाण्डेले हात पारे स्वर्ण पदक

६ औं एसियन सभात च्याम्पियनसिपमा नेपालका सुन्दर पाण्डेले उपाधि हात पारेका छन् । फेब्रुअरी ९ देखि १२सम्म भारतको नयाँ दिल्लीस्थित टालकटोरा स्टेडियममा आयोजना भएको च्याम्पियनशीपमा नगरकोट-६ फेदी, भक्तपुरमा अवस्थित क्वालिटी सेकेण्डरी स्कुलका कक्षा ७ मा अध्ययनरत छात्र सुन्दर पाण्डेले भारतको खेलाडीलाई पछि पार्दै गोल्ड मेडल जित्न सफल भएका हुन् । 

 

सेमि फाइनलमा नेपालका विश्वास भट्टराईलाई पछि पार्दै फाइनल प्रवेश गरेका पाण्डेले भारतका श्रेयश्लाई पछी पारेर गोल्ड मेडल आफ्नो पोल्टामा पारेका थिए । 

 

२८ खेलाडी र ६ प्रतिनिधि सहितको नेपाली सभात टोली च्याम्पियनशीपमा सहभागी भएको थियो । 

 

यस च्याम्पियनशीपमा नेपालले ४ स्वर्ण, ४ रजत र १४ कास्य गरी कुल २२ पदक जितेको छ । प्रतियोगितामा एसियाली राष्ट्रहरु नेपाल, इरान, उज्बेकिस्तान, चाइनिज ताइपेई, बंगलादेश, भारतलगायत देशका खेलाडीहरूले विभिन्न उमेर समूहमा असट् (लाइट कनट्याक्ट) तर्फ र कम्ब्याट (फुल कनट्याक्ट) तर्फ प्रतिस्पर्धा गरेका थिए ।