चलचित्र ‘म राजेश हमाल’को फस्टलुक पोस्टर सार्वजनिक, चैत १० गतेदेखि प्रदर्शनमा आउने

काठमाडौँ ।
नेपाली फिल्मका सुपरस्टार राजेश हमाल बन्न चाहने मुख्य चरित्रकोलाई आधार बनाएर निर्माण गरिएको चलचित्र ‘म राजेश हमाल’को फस्टलुक पोस्टर सार्वजनिक भएको छ । उक्त चलचित्र आगामी चैत १० गतेदेखि देशभर प्रदर्शनमा आउने भएको हो ।

निर्माता केदार भुसालले जन्मदिन छेकोमा फिल्मको प्रदर्शन मिति समेत घोषणा गरेका छन् । स्केच डिजाइनमा तयार पारिएको पोस्टरमा लेखिएको छ, ‘राजेश हमाल सुपरस्टार मात्र हैनन बरु एक भावना हुन् ।’ पोस्टरले फिल्मको कथावस्तुको थिम झल्काएको छ । पोस्टरमा गुडिरहेको ट्रकको पछाडि एक किशोरी कुदिरहेको देख्न सकिन्छ ।

निर्माता भुषालले हमालको जीवनमा फिल्म आधारित नरहेको बताए । जोन योञ्जन निर्देशित फिल्ममा सञ्चिता लुँइटेल, मुकुन भुसाल, महेश त्रिपाठी, एवानराज उप्रेती, संजोग रसाइली र अस्मिता लामिछानेको मुख्य भुमिका छ । आर्यन सिग्देल विशेष भूमिकामा देखिने छन् भने राजेश हमालको आवाजले कथा बोकेको छ ।

कथाकार जोन योञ्जन हुन भने पटकथा सायदले लेखेका हुन् । आलोक शुक्लाको छायांकन, भीम विश्वकर्माको सम्पादन, मणिरत्न त्रिपाठीको साउण्ड डिजाइन रहेको फिल्मको स्क्रिप्ट डक्टर भने केशव पाण्डे हुन ।

किरण कुमार महर्जन सह(निर्माता रहेको फिल्ममा जिवलाल भुसाल, नविन भुसाल र श्रृषा भुसाल भने कार्यकारी निर्माता हुन् । बड पिक्चर, जोय पपया, ट्राइडेन्ट कन्सेप्ट र फोपिको ब्यानरमा बनेको फिल्म फिल्कर आर्ट्सले निर्माण गरेको हो ।

निर्माता भुसालले यसअघि प्रदर्शनको लागि घोषणा गरेको उनको पहिलो फिल्म ‘कौसिद’को प्रदर्शन मिति कोजाग्रत पुर्णिमाको दिन सार्वजनिक गर्ने जानकारी दिए ।