‘केही हुन्न भेट हुँदैमा’लाई छोटो समयमै यूट्यूबमा २० लाख बढि भ्युज

काठमाडौं ।
नेपाली सांगितिक श्रेत्रका सक्रिय गायक नरेश बुढाथोकी र गायिका टीका प्रसाईको ‘केही हुन्न भेट हुँदैमा’ बोलको गीतले छोटो समयमै सफलता पाउन सफल भएको छ। गीत सार्वजनिक भएको छोटो समयमा नै गीतलाई यूट्यूबमा २० लाख भन्दा धेरै पटक हेरिएको छ । बजारमा आएको छोटो समयमै यो गीतले आम दर्शक श्रोताहरु बिच लोकप्रियता हासिल गरेको छ । पछिल्लो समय यो गीतलाई टिकटक र बिभिन्न समारोहमा धेरै नै रुचाइने गीतकारुपमा लिइएको छ ।

राहुल शाह र मलिका महतले अभिनय गरेको उक्त भिडियोको निर्देशन पनि राहुल शाहले नै गरेका छन् । मनोज बस्नेत र एटके एभरेष्ट मोसन पिक्चर्स तथा भाइब एण्ड वेभसँगको सहकार्यमा बजारमा आएको उक्त गीतको शब्द लोकप्रिय सर्जक एकनारायण भण्डारीको रहेको छ ।

राग स्टुडियोमा रेकर्डिङ गरिएको उक्त गीत कुशल गौतमले रेकर्ड गरेका हुन् भने मेकअप अनिता ग्वाछाको रहेको छ । उक्त भिडियोको सम्पादन पवन सुस्लिङले गरेका छन् । यसअघि ‘कान्छी हो कान्छी’गीतमा स्वर दिएका बुढाथोकीले अब आउन लागेको गीत फरक किसिमको भएको बताएका छन् ।

बुढाथोकीले गाएको कान्छी हो कान्छीमा गायिका अञ्जु पन्तले पनि साथ दिएकी थिइन् । नेपाल आइडल सिजन–४ का अडिसन राउण्डमा प्रि–जजको भूमिका निर्वाह गरिसकेका बुढाथोकी लामो समयदेखि संगीत साधनामा सक्रिय छन् ।

पछिल्लो समय लोकप्रियता कमाईरहेका बुढाथोकीले निकट भविष्यमा पनि अन्य गीतहरु ल्याउने तयारीमा रहेको पनि जनाएका छन् ।