नेपालको कोरोना नपुगेको जिल्ला रसुवा मात्र, देशका बाँकी ७६ जिल्लामा संक्रमण

काठमाडौं । अहिलेसम्म नेपालमा कोरोना संक्रमणबाट बच्न सफल जिल्ला रसुवा मात्र भएको छ । देशभर ९ हजार भन्दा बढी संक्रमित देखिइसकेको अवस्थामा देशका ७७ जिल्लामध्ये ७६ जिल्लामा कोरोना संक्रमण देखिइसकेको छ ।

स्वास्थ्य मन्त्रालयको पछिल्लो अपडेटमा ओखलढुङ्गाका एक पुरुषमा कोरोना देखिएसँगै कोरोना संक्रमण नदेखिने जिल्ला रसुवा मात्र भएको छ ।

स्वास्थ्य मन्त्रालयका अनुसार ओखलढुंगाको लिखु गाउँपालिकाका एक २८ वर्षीय पुरुषमा कोरोना सङ्क्रमण पुष्टि भएको हो ।

भारतबाट फर्किएका उनको पीसीआर रिपोर्ट पोजेटिभ आएसँगै आइतबार ओखलढुङ्गामा कोरोना सङ्क्रमित भेटिएको जिल्ला स्वास्थ्य प्रमुख सुमन तिवारीले जानकारी दिएका थिए ।

त्यस्तै आइतबार नै मुस्ताङमा पनि एक जनामा कोरोना पुष्टि भएको जानकारी दिएसँगै संक्रमण फैलिएका जिल्लाको संख्या ७५ पुगेको थियो ।