अमेरिकामा एकै दिन चार नेपालीको मृत्यु

अमेरिका । अमेरिकामा एकै दिन ४ नेपालीको मृत्यु भएको जनाइएको छ । एनआरएन अमेरिकाका महासचिव पशुपति पाण्डेका अनुसार आज एकै दिन अमेरिकाको न्यूयाेर्कमा विभिन्न कारणबाट चार जना नेपालीको मृत्यु भएका छन् ।

उनले सामाजिक सञ्जाल फेसबुकमा लेख्दै भनेका छन्, नेपाली समाजका वरिष्ठ समाजसेवी अजय छोचुन लगायत चार जनाको न्यूयोर्क शहरमा असामयिक निधन भएको खबरले स्तब्ध भएको छौं । मृत्यु हुनु भएका सबैको आत्माको चिरशान्तिको लागि भगवान सँग प्रार्थना गर्दै शोक सन्तप्त परिवारजनमा हार्दिक संवेदना प्रकट गर्दछौं ।

त्यस्तै एनआरएन अमेरिकाको एनआरएनए डब्लुआइ च्याप्टर मेम्बर सरु शर्माले पनि आफ्नो फेसबुकमा लेखेकी छिन्, साह्रै दुखद खबर सुन्नु पर्यो , न्युयोर्क नेपाली समाजबाट एकैदिन ४ जनाको निधन भएको दुखद समाचारले मननै अताल्लिएको छ । सबैको बैकुण्ठ बास होस् । सबैप्रति हार्दिक श्रद्धासुमन ! शोक सन्तप्त परिवार प्रति धैरे धारण गर्ने शक्ति मिलोश भगवान ।

शनिबार दिनभर र रातीसम्ममा चार नेपालीले ज्यान गुमाएका हुन् । यसरी ज्यान गुमाउनेहरुमा समाजसेवी अजयमान छोंचुँको उपचारका क्रममा अस्पतालमा निधन भएको हो भने अन्य तीन नेपालीको घरमा नै मृत्यु भएको जनाइएको छ । अन्यको के कारणले मृत्यु भएको सो बारेमा विस्तृत जानकारी आइसकेको छैन ।

न्युयोर्क निवासी अजयमान छोंचुँको एल्महस्र्ट अस्पतालमा उपचारका क्रममा निधन भएको उनको परिवारले जनाएको छ । केहीदिनदेखि उनको अवस्थामा गम्भिर रहेको तर सनिबार बिहान अस्पतालका कर्मचारीहरुले अवस्था सुध्रेको भनेर श्रीमतीलाई फोन गरेका थिए । अचानक राती मुटुको धड्कन रोकिएको भन्दै जानकारी गराएको बुझिएको छ ।

नेवा नख न्युयोर्कले सामाजिक सञ्जालमार्फत श्रद्धाञ्जली व्यक्त गर्दै उनको निधन हृदयघातबाट भएको जनाएको छ । छोंचुँको निधनप्रति दुख व्यक्त गर्दै शोकाकुल परिवारजनमा समवेदनमा व्यक्त गरिएको छ ।

केहीदिन अगाडि अर्जेन्ट केयरमा गएर चेकजाँच गर्दा ब्याक्टेरियल निमोनिया देखिएकोमा अर्जेन्ट केयरले अस्पतालमा जान सुझाव दिएको थियो । त्यसपछि छोंचुँलाई एल्महस्र्ट अस्पतालमा भर्ना गरिएको थियो । झण्डै दुईसाता अगाडि कोरोनाको परीक्षण गर्दा छोंचुँ र उनकी श्रीमतिमा कोरोना नेगेटिभ देखिएको थियो ।