बुद्ध एयरकाे काउन्टर ताेडफाेड गर्ने सांसद साहको रिहाइको माग गर्दै राजपाको प्रदर्शन

pramod

  काठमाडौं । विमानस्थलमा तोडफोड गरेको आरोपमा पक्राउ परेका सांसद प्रमोदकुमार साहलाई रिहा गर्न माग गर्दै राष्ट्रिय जनता पार्टी (राजपा)ले जनकपुरमा प्रदर्शन गरेको छ ।

राजपाका कार्यकर्ताले बुधबार सडकमा टायर बालेर प्रदर्शन गरेका हुन् । उनीहरुले सांसद साहलाई तत्काल रिहा गर्नुपर्ने माग राखेका छन् ।

मंगलबार प्रतिनिधिसभाको उद्योग, वाणिज्य तथा उपभोक्ता हित संरक्षण समितिअन्तर्गत अनुगमन उपसमितिको टोलीमा सहभागी भइ ओखलढुंगा जान लाग्दा साहलाई प्रहरीले काठमाडौं विमानस्थलबाट नियन्त्रणमा लिइएको थियो ।

आज जिल्ला अदालत धनुषामा उपस्थित गराइएका प्रतिनिधिसभा सदस्य साहलाई अदालतले चार दिन म्याद थपेर अनुसन्धान गर्न प्रहरीलाई अनुमति दिएको छ ।

म्याद थपपछि अदालत परिसरमा पत्रकारलाई संक्षिप्त प्रतिक्रिया दिँदै सांसद साहले अदालतले गर्ने निर्णय आफूलाई स्वीकार्य हुने र अदालतले गरेको कुराको जनताले मूल्यांकन गर्ने बताए ।

सर्लाही निर्वाचन क्षेत्र १ बाट राजपा सांसद साहमाथि जनकपुरबाट काठमाडौं जहाज उडान ढिला गरेको आक्रोशमा जनकपुर विमानस्थलमा अवस्थित बुद्ध एयरको काउन्टर तोडफोड गरेको आरोप लागेको छ ।

विमानस्थलको रन वेमा छाडा चौपाया, विशिष्ट कक्षमा फालिएको फोहर र बिरामी यात्रुबारे जानकारी गराउँदा विमानस्थल र एयरलाइन्सका कर्मचारीले वास्ता नगरेको भन्दै सांसद साहले लात हानेर बुद्ध एयरको काउन्टरको सिसा फुटाइदिएका थिए ।

मुटुको समस्या भएर उपचारका लागि जनकपुरबाट काठमाडौं आउन लागेका जनकपुरका शौखिलाल चौधरीको समस्याबारे एयरलाइन्सलाई जानकारी गराउँदा कर्मचारीले कुनै वास्ता नगरेपछि तोडफोड गर्नुपरेको सांसद साहले बताएका छन् ।

तीन घण्टासम्म विमान ढिलो हुँदा बिरामीलाई खानेपानी समेत उपलब्ध नगराएको र पटक–पटक विमान बारे जानकारी माग्दा वेवास्ता गरेको साहको भनाइ छ ।

 

Comments

Top