विप्लव समूहको स्थायी कमिटी र पोलिटब्युरो भंग, चन्द अब ‘वान म्यान आर्मी’

  काठमाडौं । प्रतिवन्धित नेत्र विक्रम चन्द ‘विप्लव’ समूहले पार्टीमा शुद्धीकरण अभियान चलाउन भन्दै स्थायी कमिटी र पोलिटब्युरो भंग गरेको छ ।

पार्टीका गतिविधिमाथि प्रतिबन्ध लागेपछि विप्लव समूहले पहिलोपटक सांगठनिक संरचनामा व्यापक फेरबदल गरेको हो ।

केही दिनअघि बसेको स्थायी कमिटी बैठकले ५ सदस्यीय स्थायी कमिटी र ११ सदस्यीय पोलिटब्युरो भंग गरेको हो ।

जसका कारण पार्टीको सबै अधिकारी अहिले महासचिव नेत्रविक्रम चन्द आफैंले लिएका छन् ।

चन्द समूहले पार्टीभित्र विकृति मौलाएको उल्लेख गर्दै १७ केन्द्रीय सदस्यलाई जिम्मेवारीबाट हटाएर ‘खुला मोर्चा’ मा पठाएको छ ।

त्यस्तै ५० केन्द्रीय सदस्यमध्ये १७ जनालाई पद घटुवा गरेर कारबाही गरिएको छ भने अझै केहीलाई कारबाही पनि हुन सक्ने स्रोतको दावी छ ।
स्थायी कमिटीमा चन्द, हेमन्तप्रकाश ओली, खडगबहादुर विश्वकर्मा, धर्मेन्द्र बाँस्तोला र सन्तोष बुढामगर थिए ।

पार्टीको स्थायी समिति र पोलिटब्युरो भंग गरी १२ जनाको सचिवालय निर्माण गरिएको छ । महासचिव नेत्रविक्रम चन्द विप्लव र प्रवक्तामा खड्गबहादुर विश्वकर्मा प्रकाण्ड यथावत् छन् । यसअघि स्थायी समितिमा रहेका विप्लव, खड्गबहादुर विक, हेमन्त प्रकाश ओली, धर्मेन्द्र बास्तोला र सन्तोष बुढा मगर सचिवालयमा छन् ।

पोलिटब्युरो सदस्यहरू भरत बम, अनिल शर्मा, ओम पुन, उमा भुजेल, वीरजंग चन्द र मोहन कार्कीलाई केन्द्रीय सदस्यमा घटुवा गरिएको छ । पोलिटब्युरो सदस्य कृष्ण धमलालाई भने केन्द्रीय सदस्यको जिम्मेवारीबाट समेत हटाइएको छ ।

त्यसैगरी केन्द्रीय सदस्य रामप्रसाद तिमल्सिना, शंकर खडका, डीडी पाण्डे, भेषराज भुसाल, पुरुषोतम विष्ट, धनबहादुर महर्जन, डम्बर विश्वकर्मा, आजाद केसीलगायत १७ जनालाई केन्द्रीय सदस्यबाट हटाएको चन्द समूहले जनाएको छ ।

सरकारले प्रतिबन्ध लगाएको अवस्थामा इमानदार कार्यकर्ता आवश्यक रहेको उल्लेख गर्दै विप्लव शुद्धीकरण अभियानबाट पार्टी झन् बलियो हुने दाबी गरेका छन् ।

पार्टीका नेता धमाधम पक्राउ पर्न थालेपछि पार्टीभित्रै आन्तरिक सूचना चुहाएको, गोपनीयता भंग गरेकोलगायतका विषयमा पार्टीमा उजुरी परेका छन् ।