- २०७७ जेष्ठ १३ गते
- हाम्रो बारे
- सम्पर्क
काठमाडौं । नेपालीहरुको महान चाड विजया दशमीको पाँच दिन अघि आज सिन्धुली र नुवाकोटमा यात्रुवहाक बस दुर्घटना हुँदा तीन जनाको मृत्यु भएको छ भने झण्डै चार दर्जन घाइते भएका छन् । सिन्धुलीको मुलकोटमा बस दुर्घटना हुँदा एक जनाको मृत्यु भएको हो । दुर्घटनामा परि ४ जना गम्भीर घाइते भएको जिल्ला प्रहरी कार्यालय, सिन्धुलीका प्रमुख एसपी रामेश्वर यादवले बताए ।
सिन्धुलीको मरिणबाट काठमाडौंतर्फ आउँदै गरेको ना ६ द ९१२ नम्बरको बस सुनकोशी नदीमा खसेको हो । बसमा अन्य पनि सवार रहेको हुन सक्ने आशंकामा खोजी र उद्दार कार्य जारी छ । गम्भीर घाइते ४ जनाको स्थानीय अस्पतालमा उपचार भइरहेको जनाइएको छ । दुर्घटना के कारणले भयो भन्ने विषयमा पनि अनुसन्धान भइरहेको प्रहरीले जनाएको छ ।
त्यसैगरी नुवाकोटको फेदीखोलामा बस दुर्घटना हुँदा दुई जनाको मृत्यु भएको हो भने ३५ जना घाइते भएका छन् । अहिले उद्दार कार्य जारी छ।
मृतकको पहिचान हुन नसकेको जिल्ला प्रहरी कार्यालय नुवाकोटले जनाएको छ । खरानीटारबाट त्रिशुली जाँदै गरेको बा १ ख ६३५६ नम्वर यात्रुबहाक बस दुर्घटना भएको हो। घटनाबारे विस्तृत विवरण आउन बाँकी रहेको पनि प्रहरीले जनाएको छ ।
त्यस्तै भोजपुरको टेम्केमैयङु गाउँपालिका–९ वलौटे भञ्ज्याङमा ट्याक्टरबाट खसेर एक महिलाको मृत्यु भएको छ। मृत्यु हुनेमा खोटाङको खोटेहाङ गाँउपालिका–२ का ३२ वर्षीया निङल्हामु शेर्पा रहेको जिल्ला प्रहरी कार्यालयले जनाएको छ ।
पाँचधारेबाट किराना पसलको सामान लिएर घरतर्फ जाँदै गर्दा शेर्पाको को२त ४६१८ नं को ट्याक्टरबाट खसेर मृत्यु भएको हो । ट्याक्टर चालकलाई प्रहरी चौकी पाँचधारेले नियन्त्रणमा लिएको प्रहरीले जनाएको छ ।
Comments