खारेज भइसकेका अस्पताल विकास समितिमा स्वास्थ्यमन्त्रीको चलखेल

 काठमाडौं। स्वास्थ्य तथा जनसंख्या मन्त्रालयले खारेज भइसकेका अस्पताल विकास समिति ब्युँताउने तयारी गरेको छ । उपप्रधानमन्त्री एवं स्वास्थ्यमन्त्री उपेन्द्र यादवको निर्देशनमा खारेज भएका ११ वटा अस्पताल विकास समिति ब्युँताउन लागिएको हो । मन्त्रालयका अनुसार समिति खारेज भएका अस्पताल विकास समिति ब्युँताउन आवश्यक टिप्पणीसहित सैद्धान्तिक सहमतिका लागि मन्त्रिपरिषद् पठाइएको छ ।
सरकारले गत २० असारको मन्त्रिपरिषद् बैठकमार्फत देशभरका अस्पताल विकास समिति खारेज गर्ने निर्णय गरेको थियो । सो निर्णयसँगै स्वास्थ्य मन्त्रालयले आफू मातहतका सबै अस्पताल विकास समिति खारेज गर्दै त्यहाँ कार्यरत पदाधिकारीलाई जिम्मेवारीबाट हटाएको व्यहोरासहितको पत्र केही दिनअगाडि मात्रै थमाएको छ ।

स्वास्थ्यमन्त्री यादवका निजी सचिव भवनाथ खतिवडाका अनुसार संघ मातहत रहेका अस्पताल विकास समितिका पदाधिकारीलाई २५ भदौको मन्त्रीस्तरीय निर्णयबाट हटाइएको बताए । देशभर ७७ वटा अस्पताल विकास समिति थिए । उनका अनुसार ७७ मध्ये संघ मातहत रहेका ११ वटा अस्पताल विकास समितिलाई पुनः ब्युँताउन सैद्धान्तिक सहमतिका लागि मन्त्रिपरिषद्मा गत आइतबार फाइल पठाएको छ ।

‘विकास समिति गठन आदेश २०१३ बमोजिम आवश्यकता र औचित्यका आधारमा ११ वटा अस्पतालका अस्पताल विकास समिति ब्युँताउने स्वास्थ्य मन्त्रालयको निर्णयअनुसार मन्त्रिपरिषद्मा प्रस्ताव लगिएको हो ।

ब्युँताउन लागेका ११ अस्पताल विकास समिति

-कान्ति बाल अस्पताल
-वीर अस्पताल
-प्रसूति तथा स्त्री रोग अस्पताल
-नरदेवी आयुर्वेद अस्पताल
-सहिद शुक्रराज ट्रपिकल अस्पताल
-धर्मभक्त माथेमा अंग प्रत्यारोपण केन्द्र
-सहिद गंगालाल राष्ट्रिय हृदयरोग केन्द्र
-पाटन स्वास्थ्य विज्ञान प्रतिष्ठान
-मानसिक रोग अस्पताल
-पोखरा स्वास्थ्य विज्ञान प्रतिष्ठान
-कर्णाली स्वास्थ्य विज्ञान प्रतिष्ठान

(नयाँ पत्रीका )