- २०७८ साउन १६ गते
- हाम्रो बारे
- सम्पर्क
काठमाडौं । तराईमा संविधान दिवसविरुद्ध कालो दिनको रुपमा मनाएको राष्ट्रिय जनता पार्टी नेपाल (राजपा)ले काठमाडौंमा भने फरक शैलीमा संविधान दिवसको पक्षमा उत्सव मनाएको रहस्य खुलेको छ । संसदको एउटा समितिले काठमाडौंको बसन्तपुरमा गरेको ‘लोकतन्त्र मेला’मा राजपा नेपालले भाग लिएर संविधान दिवस भव्य र सभ्य रुपमा मनाएको हो ।
संविधान दिवस असोज ३ गतेकै दिन ‘लोकतन्त्र मेला’ बसन्तपुरमा सुरु भएको थियो । एउटा एनजिओको दवावमा राजपा नेपालले ‘लोकतन्त्र दिवस’मा भाग लिएको स्रोतको भनाइ छ । ‘लोकतन्त्र मेला’मा भाग लिन राजपालाई बेलायतबाट सञ्चालित एनजिओले पैसा दिएको पनि रहस्य बाहिर आएको छ । एनजिओसँग तालमेल मिलाउनेमा पूर्व तराई मधेस लोकतान्त्रिक पार्टी (तमलोपा)का नेताहरू जितेन्द्र सोनल, प्रदेश २ की मन्त्री डा.डिम्पल झा, सुरेश मण्डलसहितको टिम रहेको स्रोतले जनाएको छ ।
बेलायतले दिएको डलरबाट संसदको विधायक समितिले ‘लोकतन्त्र मेला’ लगाएको हो । मेलामा दलहरूलाई उपलब्ध गराइएको स्टल, खानाखर्च, भत्ता आदि क्षेत्रमा खर्च भएको सबै पैसा एनजिओले नै तिरेको छ । त्यति मात्रै होइन ‘लोकतन्त्र मेला’ भाग लिएका नेताहरूलाई पनि भत्ताका रुपमा ठूलो रकम दिएको खुलासा भएको छ । नेपाल कम्युनिस्ट पार्टी (नेकपा), नेपाली कांग्रेस, संघीय समाजवादी फोरम नेपालसहितका दलहरूले ‘लोकतन्त्र मेला’ सहभागिता जनाउनु स्वभाविक थियो । किनभने उनीहरू संविधान दिवसका दिन विरोध प्रदर्शन गरेका थिएनन् ।
तर, राजपा नेपालले असोज ३ गते तराईका केही जिल्लामा कालो दिवसका रुपमा मनाएको थियो । संविधानको विरोध गरेको थियो । प्रदेश २ का मन्त्रीहरूले नै संविधान दिवसविरुद्ध कालो दिवसको अवसरमा आयोजित प्रदर्शनहरूको नेतृत्व आफैले गरेका थिए । त्यसरी प्रदर्शनको नेतृत्व गर्नेमा प्रदेश २ का मन्त्री जितेन्द्र सोनल पनि थिए ।
उनै मन्त्री जितेन्द्र सोनलले संविधान दिवसको खुसीयालीमा उत्सवका रुपमा बसन्तपुरमा आयोजित ‘लोकतन्त्र मेला’मा भाग लिए । सोनलले शनिबार बिहान साढे नौ बजे राजपा नेपालका अध्यक्ष महन्थ ठाकुरलाई बोलाएका थिए । तर, ठाकुरले अस्वस्थताको कारण देखाएर बसन्तपुर जान मानेनन् ।
स्रोतका अनुसार ठाकुरलाई बसन्तपुरको ‘लोकतन्त्र मेला’मा जानबाट राष्ट्रियसभाका सांसद बृषेशचन्द्र लालले रोकेका थिए । लालले ठाकुरलाई रोकेको चाल पाएपछि सोनलले अनिलकुमार झालाई बसन्तपुरमा बोलाएर संविधान दिवसको उत्सव मनाएका छन् । झालाई उनकी पत्नी प्रदेश २ की मन्त्री डा.डिम्पल झाले आफ्नै गाडीमा चढाएर ‘लोकतन्त्र मेला’को कार्यक्रमस्थल बसन्तपुर लगेकी थिइन् । बसन्तपुरमा संविधान दिवसको उत्सवका रुपमा मनाइएको ‘लोकतन्त्र मेला’मा सहभागी भएको भन्दै पूर्व तमलोपा पृष्ठभूमि भएका नेताहरूको आलोचना भएको छ । (यूनाइटेड पोस्ट साप्ताहिक )
Comments