बार्सिलोना क्वाटरफाइलनमा, मेस्सीले पुर्‍याए १०० गोल

काठमाडौं । चेल्सीलाई ३–० हराउँदै बार्सिलोना च्याम्पियन्स लिग फुटबलको क्वाटरफाइनलमा प्रवेश गरेको छ । बुधबार राति सम्पन्न अन्तिम १६ को दोस्रो लेगमा विजयी भएर बार्सिलोनाले क्वाटरफाइनलमा स्थानमात्र बनाएन लियोनल मेस्सीले १ सय गोलको रेकर्ड पनि पूरा गरे ।

घरेलु मैदानमा बार्सिलोनालाई जिताउन मेस्सीले दुई गोल गरे । यस्तै डेम्बेलेले थप एक गोल गरे । पहिलो लेगमा १–१ को बराबरी खेलेको बार्सिलोना समग्रमा ४–१ ले विजयी बन्यो । नाउ क्याम्पमा भएको खेलमा बार्सिलोनाले तेस्रो मिनेटमा नै मेस्सीको गोलबाट अग्रता लिएको थियो । खेलको २० औं मिनेटमा डेम्बेलेले गोल गरे । खेलको ६३ औं मिनेटमा मेस्सीले दोेस्रो गोल गरेपछि बार्सिलोनाले ३–० को जित निकाल्यो ।

यसअघि च्याम्पिन्स लिगमा एक सय गोल गरेको रेकर्ड रोनाल्डोको नाममा थियो । अब मेस्सीले पनि रोनाल्डोसँग बराबरी गरेका छन् । मेस्सीले १२३ खेलमा १०० गोल पूरा गरेका हुन् । रोनाल्डोले १४४ खेलबाट १०० गोल पुर्याएका थिए ।