घिमिरेको निर्देशनमा ‘आँधी तुफान २’ बन्दै

Aandhi-Tufan-2

काठमाडौं । ०६१ सालमा महेन्द्र बुढाथोकीको निर्देशनमा बनेको फिल्म ‘आँधी तुफान’ को १६ वर्षपछि सिक्वेल घोषणा गरिएको छ ।

बिहीबार राजधानीमा एक कार्यक्रमका बीच निर्माण घोषणा गरिएको फिल्ममा कलाकारदेखि निर्देशकसम्म परिवर्तन भएका छन् । अघिल्लो फिल्ममा पूजना प्रधान, ऋचा घिमिरे र रञ्जु लामीछाने मुख्य भूमिकामा थिए । फिल्मले बक्सअफिसमा राम्रो कमाइ गरेको थियो ।

यसको दोस्रो भागमा आरती आचार्य, पुनम गौतम र यांसु श्रेष्ठ मुख्य भूमिकामा देखिने भएका छन् । उनीहरूले यही फिल्मबाट अभिनेत्रीको रूपमा डेब्यू गर्न लागेका हुन् ।

मदन घिमिरेले निर्देशन गर्ने फिल्ममा मुख्य नायकमा सञ्जय खतिवडा छन् । मुकुन्द थापा, धुव्र कोइराला, कनिज कोइराला, पुस्कर राउत, सिवन लामा, राजाराम गौतमलगायतको पनि अभिनय रहनेछ ।

चैतबाट छायांकन सुरु हुन लागेको फिल्मका प्रस्तुतकर्ता मौनता श्रेष्ठ हुन् । उनले नै फिल्मको कथा लेखेका हुन् ।

रामशरण उप्रेतीको छायांकन, प्रेम चल्ठेको द्वन्द्व, सुरेश अधिकारीको संगीत, रानी शाक्यको स्वर, कमल राईको कोरियोग्राफी, हरि उप्रेती र दिनेश सुवेदीको गीत लेखन रहने ‘आँधी तुफान २’ नारी प्रधान सस्पेन्स थ्रिलर कथामा बन्ने निर्देशक घिमिरेले माइन्यूजनेपाललाई बताए ।

‘एक पात्रको हत्याको अनुसन्धानमा परिचालित तीन युवतीको कथा फिल्मले भन्नेछ । मैले एक्सन र पारिवारिक दुवै प्रकारका सफल फिल्म बनाएको छु । यसपटक एक्सनलाई प्राथमिकता दिएर उत्कृष्ट फिल्म बनाउने प्रयास गर्नेछु,’ घिमिरेले भने । नारी एक्सनलाई केन्द्रमा राखेर बनाउन लागिएको चलचित्र फरक धारको हुनेमा आफू विश्वस्त रहेको घिमिरेले बताएका छन् ।

Comments

Top