- २०७७ असोज ६ गते
- हाम्रो बारे
- सम्पर्क
काठमाडौं । पछिल्लो २४ घन्टामा नेपालमा थप ५ जना कोरोना संक्रमितको मृत्यु भएको जनाइएको छ । देशभरका विभिन्न अस्पतालहरुमा गए राती र बिहान गरी ५ जनाको मृत्यु भएको जनाइएको हो ।
बुटवलस्थित कोरोना अस्पतालमा उपचारका लागि आइसोलेसनमा भर्ना भएका कपिलवस्तुको कपिलवस्तु नगरपालिका वडा नं। २ तौलिहवाका ४२ वर्षीय कृष्णकुमार गुप्ता र कपिलवस्तुको कृष्णनगरका २५ वर्षीय प्रदीप तेलीको गएराति मृत्यु भएको हो ।
गुप्ता साउन २५ गते र तेली साउन २७ गते अस्पतालमा भर्ना भएका थिए । गुप्तामा कोरोना संक्रमण पुष्टि भए पनि तेलीको स्वाब परीक्षण हुन बाँकी छ ।
त्यस्तै ललितपुरको पाटन अस्पतालमा उपचाररत एक जना कोरोना भाइरस संक्रमितको मृत्यु भएको छ । मृतक जनकपुरकी ३८ वर्षीया महिला हुन् । यही साउन १८ गते उनी पाटन अस्पतालमा भर्ना भएकी थिइन्, स्वास्थ्य कार्यालय ललितपुरले उनको मृत्यु बुधबार भएको पुष्टि गरेको छ ।
त्यस्तै ललितपुरको ग्वार्कोस्थित किस्ट मेडिकल कलेजमा मृत्यु भएकी एकजना महिलाको कोरोना परीक्षण रिपोर्ट पोजेटिभ आएको छ ।
काठमाडौं टेकुकी ७८ वर्षीया महिलाको मंगलबार राति सवा १ बजे मृत्यु भएको किस्ट अस्पतालका चिफ अपरेटिङ अफिसर अमिस पाठकले जानकारी दिए । पाठकका अनुसार ती महिलाको बुधबार बिहान नै कोरोना परीक्षण रिपोर्ट पोजेटिभ आएको छ ।
त्यस्तै सुनसरीका एक पुरूषको पनि मृत्यु भएको जनाइएको छ । यसअघि स्वास्थ्य मन्त्रालयले नेपालमा कोरोना संक्रमणबाट ८३ जनाको मृत्यु भएको जनाएकाे थियो । पछिल्लो मृतक संख्याबारे स्वास्थ्य मन्त्रालयले पुष्टी गर्न बाँकी नै रहेको जनाइएको छ ।
Comments