रामपुर नगरप्रवेशमा पूर्ण प्रतिबन्ध, उल्लंघन गरे कैद सजाय हुने

Rampur

पाल्पा । पाल्पा जिल्लाको रामपुर नगरपालिकाले नगरभित्र प्रवेशका लागि सबैलाई प्रतिबन्ध लगाएको छ । रामपुर नगरपालिकाका नगरप्रमुख रमणबहादुर थापाले बुधबार बसेको सर्वदलीय बैठकबाट सवारीसाधन चल्न नदिनेका साथै बाहिरबाट आउने कुनै पनि व्यक्तिलाई नगरप्रवेशमा पूर्णरुपमा निषेध गरेको जनाएका छन् ।

नगरप्रमुख थापाले विश्व महामारीको रूपमा फैलिएको कोरोना भाइरसको असर नेपालमा पनि अत्याधिक बढ्दै गएकोले र रामपुर नगरपालिकालाई आवश्यक पर्ने खाद्यान्न तरकारी र निर्माण सामग्रीको आयात (ढुवानी)गर्ने छिमेकी जिल्लामा समेत यसको संक्रमण फैलिसकेको ले रामपुर नगरपालिकालाई कोरोना भाइरसबाट सुरक्षित राख्ने उद्देश्य साथ बुधबार सर्वदलीय बैठक बसेको जनाए ।

थापाले उक्त बैठकमा राजनीतिक दल, नगर सल्लाहकार, नगर समन्वय समिति, पत्रकार, इलाका प्रशासन, इलाका प्रहरी कार्यालय, नेपाली सेना समेतको बैठकले भोलि जेठ १ गते बेलुका ७ः०० बजेदेखि रामपुर नगरपालिकाभित्र आउने र बाहिर जाने अत्यावश्यक सवारी साधन बाहेक दुई पाङ्ग्रे चार पाङ्ग्रे सवारी साधन तथा बाहिरबाट आउने कुनैपनि व्यक्तिलाई समेत रामपुर नगरपालिका भित्रका सबै नाकाहरुमा जेठ ५ गतेसम्म पूर्ण रुपमा प्रवेश निषेध गर्ने निर्णय गरिएको बताए । साथै यो नियम उल्लंघन गरेमा नियमानुसार कैद र जरिवाना हुन सक्ने पनि नगरप्रमुख थापाले बताए ।

Comments

Top